Esta web utiliza cookies, puedes ver nuestra la política de cookies, aquí
Política de cookies +
Otsaila eztiegia, primadera txirtxilegia

ORIENTACIÓN AL USUARIO

Hemen zaude:
 
Maider Larrañaga (sommelier Arteaga jatetxean):

"Txakolina ondo eta konpainia onean edatea da garrantzitsuena"

Enologo arrasatear honek biharko Txakolin Eguneko dastatzea gidatuko du. Horrela, bertako ardoaz dauzkan ezagutzak jendearekin partekatu ditu.

595.Maider.Larrañaga.Arteaga.Sommelierra (id: 6511901)


Testua eta argazkia: Gontzal Landa Herbias / 2019ko uztailak 19, ostirala

 

Bihar, zapatua, Debagoieneko VI. Txakolin Eguna ospatuko da Seber Altube plazan. Bertan, zapatuko ohiko azokaz gain, eskualdeko txakolin ekoizleek postuak jarriko dituzte.
 
Eguerdiko 12:00etan Arteaga jatetxeko Maider Larrañaga Zubillaga enologoarekin eskualdeko txakolinen dastatzea egingo da. Bitartean bertako hanburgesen pintxoak jateko aukera izango da. 

 

- Zer azalduko diezu dastatzera bertaratuko diren pertsonei?

 

- Batez ere eskualdeko hiru txakolinetan zentratuko naiz. Oro har, azalduko ditut txakolina zer den, zelan egiten den eta zergatik dituen ezaugarri markatu batzuk. Gainera, gure ardoa denez, hori defendatu nahiko nuke.

 

Txakolina modu tradizional batean baserrietan egiten hasi zen. Etxerako ardo bat zen, kalitate ez oso onekoa, baina eboluzionatu du eta egungo ideia berriekin, ekoizle berriekin,... aurrera egiten dabil. Garapen hau kalean jendari azaldu behar zaio.

 

- Zein ezaugarri behar ditu txakolin batek kalitate oso ona izateko?

 

- Lehengai oso ona izatea eta oso ondo zaintzea. Mahatsa tratatzeko era ezberdinak daude, eta ekoizle bakoitzak bere estiloa dauka. Denak defendatzeko kapazak izan behar gara. Mahatsa ondo badator laguntza apur bat baino ez du behar.  

 

- Zein da garraztasun puntu egokiena?

 

- Garraztasuna garrantzitsua da ardoen ezaugarri nagusienetakoa delako. Gure klimatologiaren eta 'terroir' delakoaren ondorioz, hemengo txakolina oso garratza da. Garraztasun hau ondo bideratu beharra dago, gehiegizkoa izan ez dadin, edangarria izan dadin.

 

Garraztasuna kontrolatzeko, mahastia inaustea onuragarria izaten da, horrela eguzki gehiago sartzen baita. Bestalde, botrytisak arazo batzuk eragin ditzake. Hemengoa leku hotza denez, eguzkia ahalik eta gehien baliatu behar da.

 

- Zelakoak dira Arrasateko bi txakolinak: Kataide eta Otxia?

 

- Biek proiektu oso interesgarriak dauzkate. Pertsonalki Kataidera ez naiz joan, baina lehengo egunean Felixekin Bedoñan izan nintzen. Otxiaren mahastien lekua kontuan hartuta, halako ardo interesgarri eta ekologikoa lortzea txapela kentzeko modukoa da.

 

Aipatzekoa da ekoizpen ekologikoan kobrearekin, 'caldo bordelés' deitutakoarekin eta belarrarekin lan egiten dela. Horrek guztiorrek lan handia eskatzen du. Esate baterako, belarrak eskuz kendu behar dira eta sistemikoak ezin dira erabili. Ia 24 orduko lan bat da, mahastia zaintzen, onddorik sor ez dadin. 

 

Ardo interesgarriak ondo egiten dituzte, eta aurreko urteko txakolinak gero eta interesgarriagoak dira. Ardo gazteak izanda ere, oso ondo zahartzen dira eta ez dute horretarako barrikarik behar.

 

- Ardo zuriak ez dira zertan urtean bertan edan behar?

 

- Ez da beharrezkoa. Urtekoak, freskoak eta frutosoak oso ondo daude baina ekoizpenaren urtean bertan ez badira edaten, hurrengo urtean ere oso onak egongo dira. Areago, ekoizle ona bada, ardo hori denborarekin ontzen da. Noski, horretarako kontserbazioa ere ona izan behar du.

 

Urtean bertan edatearen istorioa ekoizle enpresa handien ideia bat izan da, arrazoi komertzialak bultzatuta, gehiago saltzeko alegia.

 

- Zein lan egiten dituzu summelier bezala Arteagan?

 

- Salako arduradun bezala lan egiten dut, eta gustuko dut ardoetan zentratzea. Zorionekoa naiz bezeroek askotan ardoa aukeratzea uzten baitidate. Saiatzen naiz euren gustuak kontuan hartuz, eurentzat interesgarriena den ardoa aukeratzen. Ahalegintzen naiz bezeroek eurentzat berriak diren ardoak probatzen, gauza berriak proba ditzaten, nolabait esanda euren 'konfort zonatik' atera daitezen. Lan honetan psikologia puntu bat beharrezkoa da. 

 

Ardo zuri, beltz, apardun,... ugari egotea, kalitate hain onekoak izatea eta prezio onean egotea baliatu behar ditugu.

 

- Zenbat ardo ezberdin dituzue Arteaga jatetxean?

 

- 2.000 inguru, ekoizle batzuren botila bana dugu, produkzio txiki batekoak direlako, edota ardo oso arraroak direlako. Horrelako botilak izatea zorte handia da. Normalean ez ditugu ardo bakoitzaren botila asko izaten, errotazioa egiten dugu, ardo ezberdinak eskaintzea gustuko dugulako.

 

Arteaga jatetxeko hainbat botila nire uneko interesgunearen araberakoak dira. Ildo honetan, ardoen munduan hasi nintzenetik gaur arte eboluzio handia izan da. Artiak [Arteagak] eta nik ere garapen handiak izan ditugu. Bide hauen eta ardoen bidearen arteko paralelismo bat egin daiteke.

 

- Zer hartu behar da kontuan txakolina edatean?

 

- Txakolina gaztea bada, kolore gutxiagokoa izango da, hori berdexka kolorekoa. Karbonikoaren puntua atzemango diogu ahoan, Getariakoa baldin bada behintzat, Bizkaikoak ez baitu ezaugarri hori. Garraztasuna sentituko dugu mihiaren atzealdean eta izkinetan.

 

Era berean, zitrikoa izaten da, sagarren garraztasun malikoa markatua duena. Ahoko freskotasuna arina izaten da. Txakolina bazkarian zehar edan daiteke, otorduaren hasieratik bukaera arte.

 

- Zerbait gehitu nahi duzu?

 

- Garrantzitsuenak dira ondo edatea eta konpainia onean egitea. Arteaga jatetxean urte ugari daramatzagu lanean, eta pertsona guztiak ongietorriak dira. Ahalik eta ondoen tratuko ditugu, eta apur bat baino gehixeago edaten bada, pertsona hobeto izaten da.  

 

 


EREMU PRIBATUA


Copyright © 2008 - MONDRABERRI
Mondraberri@gmail.com - www.mondraberri.com
Tel: 943 797837 - Arrasate Pasealekua 3-bajo / P.K. 101 - 20.500 - ARRASATE